सोलापूर : महाराष्ट्रात सुरू असलेल्या महापालिका निवडणुकांच्या रणधुमाळीत सोलापुरात घडलेल्या एका धक्कादायक घटनेने संपूर्ण राज्य हादरले आहे. उमेदवारी अर्ज मागे घेण्याच्या वादातून महाराष्ट्र नवनिर्माण सेनेचे पदाधिकारी बाळासाहेब सरवदे यांची निर्घृण हत्या झाल्याने सोलापुरात काही काळ तणावाचे वातावरण निर्माण झाले होते. या घटनेनंतर आता मनसे नेते अमित ठाकरे यांनी थेट मुख्यमंत्री देवेंद्र फडणवीस यांना पत्र लिहून या प्रकरणात संवेदनशील आणि ठोस भूमिका घेण्याची मागणी केली आहे.
बाळासाहेब सरवदे यांच्या हत्येनंतर अमित ठाकरे यांनी सोलापूर दौरा करून सरवदे कुटुंबियांची भेट घेतली होती. त्या भेटीत त्यांनी कुटुंबाचे सांत्वन करत घडलेल्या घटनेची माहिती प्रत्यक्ष जाणून घेतली. याच पार्श्वभूमीवर अमित ठाकरे यांनी मुख्यमंत्र्यांना लिहिलेल्या पत्रात आपल्या भावना अत्यंत स्पष्ट आणि भावनिक शब्दांत मांडल्या आहेत.
पत्रात अमित ठाकरे यांनी म्हटले आहे की, राजकारण इतक्या खालच्या पातळीवर जाऊ शकते, याची कल्पनाही करता येणार नाही. एका कार्यकर्त्याची इतक्या क्रूर पद्धतीने हत्या होणे हे संपूर्ण समाजासाठी चिंतेचे लक्षण आहे. सरवदे कुटुंबाच्या घरी गेल्यानंतर दोन लहान मुलींचा आक्रोश आणि त्यांच्या डोळ्यांतील असहायता पाहून आपण अक्षरशः स्तब्ध झालो असल्याचे त्यांनी नमूद केले आहे. वडिलांच्या निधनाचे गांभीर्यही न समजणाऱ्या त्या चिमुकल्या मुलींनी नुकतेच आपल्या हातांनी वडिलांचे अस्थी-विसर्जन केले, हा प्रसंग मन हेलावून टाकणारा असल्याचेही त्यांनी पत्रात लिहिले आहे.
या पार्श्वभूमीवर अमित ठाकरे यांनी मुख्यमंत्री देवेंद्र फडणवीस यांच्याकडे तीन महत्त्वाच्या मागण्या केल्या आहेत. सरवदे कुटुंबाची संपूर्ण जबाबदारी शासनाने उचलावी आणि त्यांच्या दोन्ही मुलींच्या शिक्षणासह भवितव्य सुरक्षित करण्याची हमी द्यावी, अशी पहिली मागणी त्यांनी केली आहे. दुसरीकडे, या हत्येमागील दोषींवर कठोरात कठोर कारवाई करून असा संदेश द्यावा की भविष्यात कोणीही राजकीय वादातून हिंसाचार करण्याची हिंमत करू शकणार नाही, अशी अपेक्षा त्यांनी व्यक्त केली आहे. ही शिक्षा केवळ कायदेशीर प्रक्रिया न राहता पीडित कुटुंबासाठी खऱ्या अर्थाने न्याय ठरावी, असेही त्यांनी स्पष्ट केले आहे.
तिसऱ्या आणि महत्त्वाच्या मागणीमध्ये अमित ठाकरे यांनी निवडणूक प्रक्रियेशी संबंधित नियमांमध्ये बदल करण्याची गरज अधोरेखित केली आहे. प्रचाराच्या नावाखाली होणारे वाद आणि संघर्ष हिंसक वळण घेऊ नयेत, यासाठी निवडणूक आचारसंहितेमध्ये अधिक कडक नियम लागू करावेत, अशी मागणी त्यांनी केली आहे. सत्तेसाठी कोणाचेही घर उद्ध्वस्त होऊ नये, हीच लोकशाहीची खरी संस्कृती असल्याचे त्यांनी नमूद केले आहे.
मुख्यमंत्री आणि राज्याचे गृहमंत्री म्हणून देवेंद्र फडणवीस यांची जबाबदारी अधिक मोठी असल्याचे सांगत, ही लढाई राजकारणाची नसून न्यायाची असल्याचे अमित ठाकरे यांनी पत्रात ठामपणे मांडले आहे. निवडणुका येत-जात राहतील, मात्र गेलेला माणूस पुन्हा परत येणार नाही, हे लक्षात ठेवून शासनाने संवेदनशील भूमिका घ्यावी, असे आवाहनही त्यांनी केले आहे.
दरम्यान, अमित ठाकरे यांनी मुख्यमंत्र्यांना लिहिलेले हे पत्र सध्या राज्याच्या राजकीय वर्तुळात चर्चेचा विषय ठरत आहे. निवडणुकीच्या राजकारणात हिंसाचाराला आळा घालण्याचा मुद्दा पुन्हा एकदा ऐरणीवर आला असून, सरवदे कुटुंबाला न्याय मिळवून देण्यासाठी शासन कोणती ठोस पावले उचलते, याकडे संपूर्ण राज्याचे लक्ष लागले आहे.
