शिंदखेडा ( प्रतिनिधी ) : केंद्र शासनाच्या जल जीवन मिशन २.० अंतर्गत ग्रामीण भागातील नागरिकांना स्वच्छ व सुरक्षित पिण्याचे पाणी उपलब्ध करून देण्यासाठी पाणी स्रोत स्वच्छता व सर्वेक्षण अभियान राबविण्यात येत आहे. या अभियानाची प्रभावी अंमलबजावणी करण्यासाठी तालुक्यातील सर्व आरोग्य सेवक आणि जलसुरक्षकांची आढावा बैठक १५ ऑक्टोबर २०२६ रोजी सकाळी १०.३० वाजता आयोजित करण्यात आली होती.
ग्रामीण भागातील नागरिकांना शुद्ध आणि सुरक्षित पिण्याचे पाणी मिळावे, तसेच पाण्याचे स्रोत स्वच्छ व सुस्थितीत राहावेत, या उद्देशाने जल जीवन मिशन २.० अंतर्गत विविध उपक्रम राबविण्यात येत आहेत. पावसाळ्यानंतर पिण्याच्या पाण्याच्या स्रोतांची आणि त्यांच्याशी संबंधित उपांगांची स्वच्छता करणे, सर्वेक्षण घेणे तसेच उपलब्ध माहिती अद्ययावत करणे, यावर या विशेष अभियानात भर देण्यात येत आहे.या पार्श्वभूमीवर आयोजित आढावा बैठकीत अभियानाच्या अंमलबजावणीचा आढावा घेण्यात आला. पाणी स्रोत स्वच्छता व सर्वेक्षणाचे काम नियोजनबद्ध पद्धतीने पूर्ण करणे, स्रोतांबाबतची माहिती अद्ययावत ठेवणे आणि पाणी गुणवत्तेच्या दृष्टीने आवश्यक बाबींकडे लक्ष देणे, याबाबत संबंधित अधिकारी व कर्मचाऱ्यांना मार्गदर्शन करण्यात आले.या बैठकीला गटविकास अधिकारी श्रुती कारंडे, ग्रामपंचायत विस्तार अधिकारी गणेश वेताळे, पाणी गुणवत्ता सल्लागार विजय हेलिंगराव, दीपक दिसले यांच्यासह तालुक्यातील संबंधित अधिकारी व कर्मचारी उपस्थित होते.
पिण्याच्या पाण्याचे स्रोत दूषित होऊ नयेत, यासाठी त्यांची नियमित स्वच्छता व योग्य देखभाल करणे आवश्यक आहे. तसेच पाणी गुणवत्तेबाबत ग्रामीण भागातील नागरिकांमध्ये जनजागृती निर्माण करणेही महत्त्वाचे आहे. या अभियानाच्या माध्यमातून पाणी स्रोतांची सद्यस्थिती जाणून घेणे, आवश्यक माहिती संकलित करणे आणि स्वच्छतेच्या उपाययोजनांना गती देणे अपेक्षित आहे.जल जीवन मिशन २.० अंतर्गत राबविण्यात येणाऱ्या या अभियानाच्या यशस्वी अंमलबजावणीसाठी आरोग्य सेवक आणि जलसुरक्षकांची भूमिका महत्त्वपूर्ण ठरणार आहे. स्वच्छ पाणी, निरोगी जीवन आणि समृद्ध गाव या उद्दिष्टांच्या पूर्ततेसाठी सर्व संबंधितांनी समन्वयाने काम करण्याचे महत्त्व या बैठकीत अधोरेखित करण्यात आले.
