पुणे : पुणे शिक्षक आणि पदवीधर मतदारसंघाच्या आगामी विधान परिषद निवडणुकीच्या पार्श्वभूमीवर संभाव्य उमेदवारांच्या नावांची चर्चा सुरू झाली आहे. महायुतीकडूनही निवडणुकीची तयारी सुरू असल्याची चर्चा असतानाच सामाजिक प्रश्नांवर आक्रमक भूमिका घेणारे विद्यानंद बापट यांचे नाव अचानक चर्चेत आले आहे. प्रसिद्ध वकील असीम सरोदे यांनी केलेल्या एका सोशल मीडिया पोस्टमुळे बापट यांच्या संभाव्य राजकीय प्रवेशाची चर्चा रंगली आहे.
विद्यानंद बापट हे पुण्यातील गणेशोत्सवातील ध्वनिप्रदूषण आणि डीजेच्या मोठ्या आवाजाविरोधातील भूमिकेमुळे विशेष चर्चेत आले होते. गणेश आगमन आणि विसर्जन मिरवणुकीतील डीजेच्या दणदणाटाविरोधात त्यांनी सातत्याने भूमिका मांडली. या भूमिकेमुळे त्यांना विरोधालाही सामोरे जावे लागले. त्यांच्यावर हल्लाही झाल्याचा उल्लेख केला जातो. मात्र, त्यानंतर ध्वनिप्रदूषणाचा मुद्दा पुन्हा चर्चेच्या केंद्रस्थानी आला.
असीम सरोदे यांच्या पोस्टने चर्चेला सुरुवात
याच पार्श्वभूमीवर असीम सरोदे यांनी एक्सवर विद्यानंद बापट यांच्यासोबतचा फोटो पोस्ट करत त्यांच्या सामाजिक भूमिकेचे कौतुक केले. त्याचबरोबर बापट यांनी पदवीधर मतदारसंघातून निवडणूक लढवावी का, असा थेट प्रश्नही त्यांनी उपस्थित केला.
सरोजे यांनी आपल्या पोस्टमध्ये बापट हे ध्वनिप्रदूषणाच्या विरोधात निर्भयपणे भूमिका घेणारे व्यक्ती असल्याचे म्हटले. सामाजिक प्रश्नांवर बोलताना भाषेचा स्तर आणि विषयाची मांडणी याकडे ते लक्ष देतात, असेही त्यांनी नमूद केले. बापट यांच्या शैक्षणिक आणि सामाजिक जाणिवांचा उल्लेख करत सरोदे यांनी त्यांना पदवीधर मतदारसंघातून निवडणूक लढवण्याबाबत प्रश्न उपस्थित केला.
डीजेविरोधातील आंदोलनातून राजकीय मैदानात?
विद्यानंद बापट यांच्या नावाची चर्चा होण्यामागे त्यांची डीजेविरोधातील भूमिका हा महत्त्वाचा मुद्दा ठरत आहे. सार्वजनिक ठिकाणी होणारे ध्वनिप्रदूषण, उत्सवांमधील वाढता आवाज आणि त्याचा नागरिकांवर होणारा परिणाम याबाबत त्यांनी सातत्याने भूमिका घेतली आहे.
विशेष म्हणजे, पुण्यातील डीजेच्या आवाजाचा मुद्दा केवळ सोशल मीडिया किंवा स्थानिक चर्चेपुरता मर्यादित न राहता त्यावरून वादही निर्माण झाले. बापट यांच्यावर झालेल्या हल्ल्यानंतर त्यांच्या भूमिकेची राज्यभरात चर्चा झाली.
लाऊडस्पीकरबाबत बापट यांची भूमिका काय?
लाऊडस्पीकरच्या वापराबाबत विद्यानंद बापट यांनी कठोर भूमिका मांडली आहे. खुल्या वातावरणात लाऊडस्पीकरच्या वापरावर बंदी असावी, असे त्यांचे मत आहे. सण-उत्सवांच्या काळात ध्वनिप्रदूषणाच्या नियमांची अंमलबजावणी शिथिल होऊ नये, तसेच पोलिसांनी उत्सवांच्या आधीच प्रतिबंधात्मक नियोजन करून नियमांची अंमलबजावणी करावी, अशी त्यांची भूमिका आहे.
त्यांच्या मते, ध्वनिप्रदूषणाचा प्रश्न केवळ एखाद्या एका सणापुरता मर्यादित न ठेवता त्यावर कायमस्वरूपी उपाययोजना करण्याची गरज आहे.
उमेदवारीबाबत अद्याप अधिकृत घोषणा नाही
असीम सरोदे यांच्या पोस्टमुळे विद्यानंद बापट यांच्या नावाची राजकीय वर्तुळात चर्चा सुरू झाली असली, तरी बापट हे पुणे पदवीधर मतदारसंघातून निवडणूक लढवणार असल्याची कोणतीही अधिकृत घोषणा झालेली नाही. त्यामुळे सध्या ही चर्चा संभाव्य उमेदवारीच्या पातळीवरच आहे.
मात्र, सामाजिक प्रश्नांवर सातत्याने भूमिका मांडणाऱ्या बापट यांना विधान परिषदेच्या निवडणुकीच्या मैदानात उतरवले जाणार का, याकडे आता राजकीय वर्तुळाचे लक्ष लागले आहे. आगामी काळात त्यांच्या भूमिकेकडे आणि संभाव्य राजकीय हालचालींकडे लक्ष राहणार आहे.
